Fruntone di a cappella di u cunventu di i Missiunari di Bastia

U Fruntone di a cappella di u cunventu di i Missiunari di Bastia hè un'opera d'arte chì si trova à u Museu di Bastia^[1]. Rapresenta u stemma di a Republica di Ghjenuva: dui griffoni tenenu un blasone cù una croce.

L'artistu si chjama Francesco Baratta, natu in a cità tuscana di Carrara^[2].

A scultura hè fatta di marmeru.

Si truvava prima sopr'à l'entrata di a cappella di u cunventu di i Missiunari Lazaristi (l'attuale liceu Jean Nicoli). Dop'à a cunquista francese, u cunventu diventa a sede di u putere francese. Tandu, a croce di Ghjenuva hè zuccata è hè rimpiazzata da trè fiori di lice, simbuli di u reame di Francia^[1].

Più tardi, i dui griffoni sò messi nant'à dui pilastri, vicini di a funtana di u Guadellu (oghje Piazza Vattelapesca). Si vedenu nant'à e carte pustale antiche^[2].

U griffone hè un animale miticu cumpostu da dui animali : testa è ale d'acula, corpu è zampe di leone. Simbulizeghja a forza (u leone) è a prutezzione (l'acula). U griffone si ritrova spessu à u Medievu. Diventa u simbulu di a Republica di Ghjenuva : dui griffoni chì ingiranu u stemma ghjenuvese, una croce rossa nant'à fondu biancu : hè a croce di San Ghjorghju.

Infurmazione

Numeru d'inventariu : MEC.2005.0.15.1-3

Note

1 2 https://pop.culture.gouv.fr/notice/joconde/03290009841
1 2 Elisabeth Cornetto et Sylvain Gregori, Bastia, une histoire revisitée catalogue des collections permanentes exposées, Musée de la Ville de Bastia, 2011. ISBN : 9782953641325

[:0-1] 1 2 https://pop.culture.gouv.fr/notice/joconde/03290009841

[:1-2] 1 2 Elisabeth Cornetto et Sylvain Gregori, Bastia, une histoire revisitée catalogue des collections permanentes exposées, Musée de la Ville de Bastia, 2011. ISBN : 9782953641325

[1]

[2]