Folcloru

U folcloru hè un inseme di forme di cultura populare chì comprendenu e tradizione trasmesse à spessu per via orale. 'Sse tradizione riguardanu e cunniscenze, l'usi, i custumi, e credenze populare, i miti, e favule, e legende, è ancu e filastrocche, i pruverbii, a musica, u cantu è a danza. Tutti sti elementi sò ligati à una zona geografica determinata, à una pupulazione specifica o à i strati populari, cum'è i paisani è i muntagnoli.

Paris, 1930, U carru di a regina di a Corsica

Nascita di u termine

L'urigine di a parolla "folcloru" hè attribuita à u scrittore è antiquariu inglese William Thoms (1803-1900). In u 1846, sottu u pseudonimu di Ambrose Merton, publicò una lettera nant'à a rivista londinese Athenaeum, per prupone un novu vocabulu chì pudissi riunisce tutti i studii nantu à e tradizione populare inglese. U termine fù dopu accettatu da a cumunità scentifica internaziunale à parte si da u 1878.

Storia di i studii nant'à u folcloru

I studii nant'à u folcloru sò sviluppati in u XIX sèculu, in u cuntestu di u muvimentu rumanticu. I fratelli Grimm, per esempiu, studietenu e favule è i raconti tedeschi, cunsiderendu li cum'è l'espressione di l'«anima di u populu» (Volksgeist). Stu cuncettu era dighjà statu difesu da Johann Gottfried Herder.

Più tardi, l'approcciu antropologicu hà permessu di studià u folcloru in modu più "scentificu", cullighendu l'uralità cù l'usi, l'arti è i custumi di i strati populari. Antropologhi cum'è Edward Burnett Tylor è James Frazer anu cunsideratu u folcloru cum'è una sopravvivenza di forme di pinsamentu arcaicu è magico-religiosu.

In u XX sèculu, sò emerse altre metodulugie, cum'è l'approcciu storicu-culturale di a scola di Vienna o u metudu geugraficu di Arnold van Gennep.

U significatu di "mitu" sicondu Claude Lévi-Strauss

L'antropologu francese Claude Lévi-Strauss hà studiatu i miti è u so significatu. Hà rimarcatu chì, benchì i raconti mitichi possinu sembrà spruvisti di sensu o assurdi, si ritrovanu in forme simili in culture assai luntane trà elle. Sicondu ellu, i miti custituiscenu "sistemi chjusi" di pinsamentu chì anu strutture furmale simile ma cuntenuti variabili. Mentre a scienza cerca spiegazione parziale, u mitu prova à dà una cumprensione tutale di l'universu, ancu s'ellu ùn accresce micca u putere materiale di l'omu nant'à u so ambiente.