Punta di e Caldane

À prupositu di Wikipedia
(Reindirizzamentu da E caldane)
E Caldane, viste da Antisanti

E Caldane sò una serra muntagnola culminendu à 1731 metri d'altitudine, custituendu a siconda vetta di u massicciu di u San Petrone, in u centr'estu di a Corsica. Sò situate annantu à e cumune di Bustanicu è di Pianellu.[1]

Geugrafia[mudificà | edità a fonte]

Vista annantu à l'Alesani è a bassa valle di u Fiumaltu.

E Caldane sò una serra di media muntagna chì si stende annantu à una dicina di chilomitri da u nordupunente versu u sudestu. U spiculu cumporta in a so parte più alta una successione d'eminenze pocu marcate vicinu à 1700 metri d'altitudine, da u nordu à u sudu, u Monte Mufraghje (1712 m), a Cima di Callerucciu (1731 m), a Punta di e Caldane (1724 m) induv'ella si trova a croce cimaghja, è a Punta Ventosa (1686 m).

À u nordu, e Caldane sò spiccate da u San Petrone (1767 m), u culmine di u massicciu, da a foce d'Orezza (1296 m)[2]. U rilievu s'inducisce à pocu à pocu versu u sudestu sin'à a foce di Muteri.

E Caldane custituiscenu a limita naturale tràl'Ellerata è a Castagniccia. Bon' parechji paesi di quest'ultima, situati à u pede di u virsante orientale, ponu esse ossirvati dapoi u spiculu cimaghju.

Girandulata[mudificà | edità a fonte]

Paisaghju di u spiculu cimaghju di e Caldane

A catena di e Caldane hè imprudata da numerosi stradelli più o menu intrattenuti. L'accessu u più friquintatu per righjunghje u spiculu cimaghju percorre u virsante sudu dapoi u paese di Pianellu, via a cappella San Vincenzu è i pasciali di Peri. L'altru accessu magiore hè a foce d'Orezza (1296 m), accessibile da unu bellu stradellu dapoi Campudonicu o Pia d'Orezza, o ancu di manera più difficile dapoi Loriani. Esistenu però altre pussibilità di righjunghje a vetta, cum'è a Bocca Callerucciu (dapoi Bustanicu, A Mazzola, Carticasi o ancu Piubetta) o a foce di Muteri (dapoi I Perelli, Nuvale, Pianellu, Matra o ancu Moita).

E Caldane sò una destinazione di girandulata di prima trinca, abbraccendu tanta l'inseme di l'alta muntagna corsa (massicci di u Monte Cintu, di u Monte Rutondu, di u Monte Renosu è di l'Alcudine) o a larga valle di u Tavignanu ch'è i paesi di Castagniccia è u litturale orientale dapoi Sari sin'à a citatella di Bastia. Ma ùn ci vole micca à sottustimà a so ruzezza, ligata à un' impurtante slivellata, à u gattivu statu di i stradelli, à una vegetazione à spessu pagna chì rende l'orientamentu prublematicu è soprattuttu à u clima particularmente umitu è imprevidibile chì infierisce in 'ssu massicciu.

Note[mudificà | edità a fonte]

  1. 'Ss'articulu pruvene in parte da l'articulu currispundente di a wikipedia in francese.
  2. A foce d'Orezza hè numinata per isbagliu Bocca al Pratu annantu à e carte di l'IGN. 'Ss'errore risulta prubabilmente d'una cunfusione incù a foce di Pratu, situatu qualchì chilomitri più à u nordu annantu à listessua serra (Bocca al Pratu hè a trascrizzione litterale in talianu di u tuponimu corsu Bocca à u Pratu di a foce di Pratu).

Da vede dinù[mudificà | edità a fonte]