Custantinu II di Cagliari
Custantinu II di Cagliari fù Ghjudici di Cagliari versu 1130 insin'à 1163.[1]
Urighjini[mudificà | edità a fonte]
Custantinu II, fiddolu solu di Marianu II Torchitorio, Ghjudici di Cagliari (versu 1107 - versu 1121/1130), nasci in i primi anni di u XIIu seculu è com'è iddu hè d'usu in a sterpa di i Ghjudici di Cagliari, hè assuciatu à u tronu da i so primi annati.
Regnu[mudificà | edità a fonte]
A parsona ignora l'annata ind'iddu principia à rignà solu, di sicuru pocu innanzi à 1130 chì quidd'annu u 13 di frivaghju, s'intitulighja par a prima volta "Iudex Caralitanus" quandu iddu cunferma una dunazioni fatta da u so babbu. Cunfurmamenti à l'antica tradizioni chì vulia chì u tronu di Cagliari fussi di manera altirnativa accupatu da un "Torchitorio d'Ugunali" è un "Salusio di Lacon", adotta u nomu di regnu di "Salusio di Lacon". In uni pochi di ducumenti, pidda u nomu di "di 'Pluminus", da u nomu di a lucalità in a quali i Ghjudici di Cagliari aiani stabilitu a so risidenza quandu a pupulazioni aia abbandunatu l'antica cità à u mumentu di l'incursioni di i Sarracini par un locu più faciuli da difenda.
U regnu di Custantinu II dura una trintina d'anni ed hè un mumentu impurtanti di a storia di Cagliari. Hè à 'ss'ebbica ch'idda principia a lotta trà u Santu Sediu, Ghjenuva è a ripublica di Pisa, i trè putenzi cuntinintali chì vuliani assicurà si una pusizioni privilighjata è affirmà a so egemunia annantu à u Regnu di Cagliari è u Mari Tarraniu uccidentali. A rivalità trà i dui ripublichi marittimi di Pisa è di Ghjenuva hè à l'urighjini d'una guerra in u 1120 annantu à a quistioni apparintamenti ecclesiastica di l'ubbidienza di i veschi di Corsica è chì ùn si tarminarà ch'è in u 1133.
I soli ducumenti chì si disponi annantu à Custantinu II sò rilativi à i dunazioni di tarri è di i cuncissioni di privileghji in istituzioni riligiosi par u più annantu à u cuntinenti ciò chì mostra bè l'intaressi pulitichi di forzi in prisenza è sò a sprissioni non tantu di u zelu riligiosu di u Ghjudici ch'è di i so uriintamenti pulitichi.
Custantinu II mori in u 1163.
Unioni è pusterità[mudificà | edità a fonte]
Custantinu II avia spusatu Giorgia d'Unali, in prima nozza è dopu Sardinia di Zori. Da i so dui unioni, lascia trè fiddoli:
- una fiddola maiori anonima chì sposa à Petru di Torres, frateddu di u Ghjudici Barisone II di Torres;
- Giorgia, chì sposa u pisanu Oberto marchesi di Massa, isciutu da a famidda di l'Obertenghi;
- Preziosa, a terza chì sposa un antru nobili di Pisa, Tedice (I) di Donoratico, antinatu di a sterpa di i Della Gherardesca.
Bibliugrafia[mudificà | edità a fonte]
- Gian Giacomo Ortu A Sardegna dei giudici, Regione autonoma della Sardegna, 2005.
Da veda dinò[mudificà | edità a fonte]
Noti[mudificà | edità a fonte]
- ↑ 'Ss'articulu pruveni in parti da l'articulu currispundenti di a wikipedia in francesu.