Cultura di massa

A cultura di massa hè fatta di valori, idee è pratiche cundivise da strati suciali largamenti sparti in a sucietà cuntempuranea, chì i so cuntinuti sò trasmessi per a maiò parte da i mezi di cumunicazione di massa. L'espressione hè qualchì volta usata in oppusizione à quella di cultura alta, o di classa privilegiata, riferita à e fasce suciale duminante in u campu simbolicu di a cultura. In pusizione media si trova u segmentu chjamatu Middlebrow.

Ghjurnali di moda à Copenaghen

Creazione è diffusione

A cultura di massa hè u risultatu d'una pruduzione industriale è hè gestita da l'investitori privati pruprietarii di i mezi di cumunicazione di massa. Questu vale per e sucietà induv'ellu regna u libru mercatu; altrimente pò esse creata di modu artificiale da i guverni tutalitarii per cuntrullà a sucietà.

I mezi di cumunicazione di massa — prima i ghjurnali, poi u cinema è soprattuttu a televisione — anu avutu a pussibilità di creà, in e sucietà uccidentale, una vera è propria cultura di massa. Sicondu Fabio Dei, in a mudernità avanzata a pruduzione industriale d'imaghjine è i so flussi di diffusione mettenu à disposizione una quantità senza precedente di simboli culturalmente significativi.

Grande impattu anu avutu e teorizazione di Theodor W. Adorno è di l'altri filosofi di a Scola di Francuforte, chì vidianu in a cultura industriale diventata cultura di massa u principale strumentu di perpetuazione di l'egemonia culturale di e classe superiore. Per queste ragione, l'elementi classificabili cum'è cultura di massa sò spessu oghjettu di critiche chì i qualicicheghjanu di superficiali, cunsumistichi o bioti di cuntinutu. A bassa qualità di i prugrammi televisivi, in particulare, vene da a necessità di realizzà u massimu prufittu pussibule, vindendu u pruduttu à una massa d'acquistatori a più vasta pussibule; per quessa si realizeghjanu prugrammi chì appiattiscenu i spettatori annantu à un livellu culturale banale.

Altri approcci teorichi, cum'è quelli di i cultural studies, criticheghjanu a visione di a cultura di massa cum'è diffusione unidirezionale di cuntinuti omulugati, incalchendu annantu à a rielaborazione attiva è creativa. Vance Packard hà denunciatu u putere di e campagne publicitarie. I mezi di cumunicazione di massa anu dunque allargatu à u populu a diffusione d'una cultura cusmopolita è demucratica, ma à listessu tempu anu apertu a strada à u totalitarismu è suscitanu ancu interrugazione annantu à e pussibilità di i grandi puteri ecunomichi di cuntrullà e masse secondu i so interessi.

Rapportu cù a cultura pupulare

Ùn si deve cunfonde a cultura di massa cù a cultura pupulare, in u sensu di tradizione pupulare, cuncettu assimilevule à quellu di folcloru: mentre a cultura pupulare di e sucietà tradiziunale era una pruduzione spuntanea di e classe subalterne, a cultura di massa, tipica di e sole sucietà entrate in a fasa di cunsumu di massa, hè à u cuntrariu un pruduttu custruitu drentu l'industria culturale da quelli chì ne gestiscenu i mezi.

In a letteratura scentifica si cunfrontanu dui currenti annantu à u cuncettu di cultura pupulare:

Sicondu u prima currente, in l'epica preindustriale a cultura pupulare cuncidia sustanzialmente cù u folcloru, da intende si cum'è ciò chì si riferisce à una tradizione arcaica o à l'usi è custumi tradiziunali. U folcloru hè nettamente distintu da a cultura pupulare: ciò chì hè tradiziunale hè distintu da ciò chì hè mudernu. A cultura pupulare, à differenza di u folcloru, inghjenna è diffonde cuntinamente mudelli è tendenze nove, in particulare per via di l'industria culturale.

In l'ultimi dicennii di u XX sèculu si sò sparti approcci teorichi chì mettenu in discussione a validità scentifica d'una separazione effettuata secondu tali criterii, critichendu a cuncettualizazione di e tradizione cum'è elementi cristallizati è sturicamente immutati.