Cardone

U paese di Bustanicu, in Boziu

Cardone, di u so veru nome Antone Francescu Defranchi, certe volte mal ortografiatu in Lanfranchi, hè un persunagiu di a storia di Corsica. Ùn si cunnoscenu e so date di nascita è di morte.

Biografia

U so nome hè ammintatu in l'episodiu di a rivolta fiscale partuta da u paese di Bustanicu, di dicembre di u 1729, in a pieve di Boziu. Sta rivolta, chì s'hè stesa à tutta a Castagniccia hè sbucciata nant'à a guerra di 40 anni è u guvernu di Pasquale Paoli.

Ùn si sà nunda d'ellu, à tal puntu chì certi storichi rimettenu in causa a so esistenza. Ciò ch'è no sapemu d'ellu, u duvimu à dui storichi, Carlo Rostini è Bonfiglio Guelfucci, chì scrivenu vint'anni dopu à i fatti. Spieganu chì u liutenante di Corti, per pagà u so segratariu, prete Matteu Pieraggi, avia devisu di cresce l'impositu chjamatu a taglia d'ottu denari. In più, si duvia pagà l'impositu dettu di i dui seini. À a fine di u mese di dicembre 1729, u cullettore curtinese di a taglia è i so omi collanu in u paese di Bustanicu per ricuperà l'impositu. Ma Cardone, presentatu cum'è un poveru vechju, era in l'impussibilità di pagà ciò ch'ellu duvia. I paisani bustanichesi averianu pigliatu a difesa di u vechju Defranchi è u cullettore di l'impositu è i so omi si ne sarianu andati in Corti.

In e settimane à vene, di ghjennaghju 1730, a rivolta tocca a pieve di Tavagna è dopu a Castagniccia sana. Di ferraghju, i rivultati si ne piglianu à a cità di Bastia chì hè assaltata. U quartieru di Terravechja hè messu à l'abottu. Hè u principiu di a prima rivuluzione di Corsica.

In omagiu, u nome di "Square Cardone" hè datu à una piazza di Bustanicu.