Callinectes sapidus

U ganciu turchinu
Callinectes sapidus
Classificazione scentifica
Regnu	Animalia
Imbrancamentu	Arthropoda
Classa	Malacostraca
Ordine	Decapoda
Famiglia	Portunidae
Generu	Callinectes
Nome binuminale
Callinectes sapidus Rathbun, 1896

U ganciu turchinu (Callinectes sapidus Rathbun, 1896) hè un crustaceu decapodu brachiuru di a famiglia di i Portunidae, tipicu d’estuarii, lagune è d’altri ambienti salmastri ma prisente dinù in acque dolce è marine custiere. Hè una spezia autottona di e coste atlantiche di u cuntinente americanu induv'ellu raprisenta un pruduttu di pesca impurtantissimu postu chì e so carne sò assai apprezzate in cucina. Hà un’alimentazione onnivora pocu spezializata ancu sì assai efficace in a predazione di i molluschi bivalvi. À u livellu ambientale hè pocu esigente è capace à adattà si à varie cundizione è ambienti, ancu s'elli sò piuttostu cumprumessi. E larve planctoniche – chì ponu sviluppà si solu in acque salate – sò capace di viaghjà longhe distanze in mare. Ancu per issi mutivi, hè statu largamente intraduttu è acclimatatu fora di u so areale naturale, à spessu cù gravi effetti dannosi nant’à e cumunità biologiche.

Hè signalatu nant’à e coste atlantiche europee da l’iniziu di u Novecentu, è in u Mediterraneu urientale da l’anni trenta o quaranta. Si suppone ch’ellu sia ghjuntu in u Mare Adriaticu in l’anni 1940, ma fù identificatu solu in u 1993.

A stabilizazione, l’aumentu particularmente rapidu è invasivu di a so diffusione in u settore uccidentale à partesi da u secondu decenniu di u 2000 hà suscitatu alarma per via di i pussibuli danni ecosistemichi è à l’industria di a pesca, sopratuttu nant’à e pupulazione di molluschi d’interessu ecunomicu. St’alarma hà truvatu dinù ecu nant’à i media generalisti.

Distribuzione è ambiente

Areale nativu

A spezia hè uriginaria di a parte uccidentale di l’oceanu Atlànticu, induv'ella campa longu à e coste di u cuntinente americanu sanu, da a Nova Scozia à l’Uruguay cumpresu e Bermude, u golfu di Messicu sanu, u mare di i Caraibi è e piccule è grande Antiglie. In l’acque nordamericane hè storicamente signalata a presenza di pupulazione stabile à u nordu sin’à Capu Cod, in Massachusetts, mentre chì i signalamenti in lochi più settintriunali eranu per u più riferite à individui o gruppi d’individui erratichi prisenti solu durante a staghjone calda è micca à pupulazione capace d’autosustene si datu l’assenza di femine ovigere. In u 2015 hè stata però accertata a presenza d’una pupulazione stabile in u golfu di Maine, circa 500 km più à nordu. A distribuzione in a parte sud di l’areale hè menu cunnisciuta: certe fonte riportanu l’Uruguay cum’è limite meridiunale, mentre altre riferiscenu a so presenza in u nordu di l’Argentina senza eppuru dà infurmazione nant’à a cunsistenza è a stabilità di e pupulazione.

Spezia introdutta

A spezia hè stata introdutta in numerose aree esterne à u so areale cum’è u mare di u Nordu, u mar Balticu, u Mar Neru, u mare Mediterraneu è u Giappone. A via d’introduzione più prubabile hè quella accidentale duvuta à stadi larvali pelagichi liberati cù l’acque di balastu di i batelli. Eppuru, sò state prese in cunsiderazione dinù altre vie d’arrivu di a spezia, cum’è rilasci più o menu intensiunali, trasportu passivu nant’à i scafi o in massi d’alga è espansione naturale di l’areale. L’abbundante presenza di a spezia vicinu à i grandi porti in i Stati Uniti è l’allucamentu di e prime culunie in Europa dentru à zone portuale cù trafficu trasatlanticu rendenu l’ipotesi di u trasportu in l’acque di balastu quella più prubabile è universalmente accittata. Analise genetiche nant’à i ganci turchini di u Mediterraneu anu mustratu una bassissima diversità genetica duvuta à l’effettu di u fundatore. Ne risulta dunque chì tutta a pupulazione mediterranea (è prubabilmente europea) deriva da puchissimi eventi effettivi d’introduzione.

Ganciu turchinu fotugrafiatu sottu à l'acqua

I primi signalamenti per l’Europa ricollanu à u 1900 nant’à a costa atlàntica settintriunale francese da induve si hè diffusa à l’acque di i Paesi Bassi, Germania è Danimarca fermendu eppuru sporadica cù signalazione occasionale sin’almenu à u 1965. In u mare di u Nordu, un aumentu di e pupulazione si hè riscontratu da u 1975, puru mustrendu abbundanze assai inferiore à quelle custattate in u Mediterraneu. A presenza in u Mediterraneu hè stata accertata a prima volta in u 1937 in u mar Egeu, poi in Egittu in u 1940 è un annu dopu in l’Adriaticu settintriunale. E prime pupulazione naturalizate in u mare di Levante è in u mare Egeu sò signalate solu da u 1959; à parte si da sti primi nuclei di culunizazione si assiste à una rapida diffusione di a spezia in a parte urientale di u Mediterraneu mentre, sin’almenu à u 2006, i signalamenti per u Mediterraneu uccidentale eranu sporadichi, occasionali è senza segni di naturalizazione. In u 2008 a situazione fotugrafiata da l’atlante di e spezie aliene di u mare Mediterraneu di a CIESM signalava a spezia cum’è frequente in u Mediterraneu urientale da l’Egittu à a parte meridiunale di u mare di Marmara, cumpresa l’isula di Cipru, è in u golfu di Saloniccu, mentre era pocu cumuna in l’estremu nordu di u mare Adriaticu. Signalazione occasionale eranu ripurtate per u mare Ligure, u golfu di u Lione, Malta, u mare Ionicu è e coste di l’Adriaticu cintrale. Da l’anni 2000 ma sopratuttu in u 2016-2023, a diffusione in u Mediterraneu uccidentale hà avutu un forte incrementu, culunizendu tutte e coste di u bacinu è ancu aree fora di u Strettu di Gibilterra cum’è e coste atlantiche di a Spagna è di u Maroccu è culunizendu sin’à l’isule Canarie. St’espansione hà avutu talvolta una velocità esplusiva cum’è in i casi di e foce di i fiumi Neretva o Ebru. L’espansione versu u bacinu uccidentale, più fretu, di u mare Mediterraneu puderia esse rilaziunata cù l’aumentu di e timperature medie di stu mare datu chì a presenza d’ambienti idonei è cundizione ambientale favurevule pare esse pusitivamente rilaziunata cù l’aumentu di e timperature ambientale.

In u 2023 u ganciu turchinu s'avvera prisente è naturalizatu in u Mediterraneu sanu.

Descrizzione

U ganciu turchinu hà u carapace larga più di u doppiu di a lunghezza, cù granulature sopratuttu in a parte anteriore. Nant’à a fronte sò prisenti dui denti di forma triangulare. Nant’à i lati di a carapazza, in a parte anteriore è laterale, sò prisenti novi paghji di denti, i più posteriore di i quali sò assai più grande chè l’altri è trasfurmati in una spina robusta diretta versu l’esternu; l’aspettu di a spina laterale hè variabile trà l’individui è pò esse più o menu pinzutu o rivultà appena in daretu.

I pereiopodi, vale à dì l’appendici toracichi o zampe, sò cinque paghji di i quali u più anteriore, cum’è in tutti i ganci, hè trasfurmatu in pinze è chjamatu chelipede; e pinze sò assai robuste è più longhe chè l’altri quattru paghji d’appendici. Nant’à u latu anteriore di u mero, u segmentu basale di i chelipedi, sò prisenti trè spine robuste, mentre una hè situata nant’à u latu esternu in a parte finale. Nant’à u latu internu di u carpu, u segmentu di u chelipede dopu à u meru, ùn sò micca prisente spine. U propodiu, l’ultimu segmentu di u chelipede currispundente à a pinza vera è propria. Cum’è in tutti i Portunidae l’ultimu paghju posteriore di pereiopodi hà i dui elementi finali appiattiti in forma di paletta.

L’addome hè, cum’è in generale ind'ì i ganci, chjucu, appiattitu è ripiegatu sottu à u torace; a so forma custituisce u più evidente dimorfisimu sessuale di sta spezia: in u masciu l’addome hà grossulanamente a forma di a lettera "T" è hè custituitu da dui segmenti basali larghi, mentre i restanti sò assai fini; ind'ì a femina a forma hè triangulare in l’individui immaturi è ovale in quelli adulti.

A culurazione di u latu dorsale di a carapazza hà una certa variabilità è và da u grisgicciu à u verde aliva cù sfumature turchine; e spine nant’à i bordi di a carapazza ponu esse russicce. E zampe sò di regula verde brunicciu cù parte variamente culurate di turchinu è biancu è articulazione frà i segmenti qualchì volta russicce. A culurazione di e punte di e pinze hè un caratteru chì permette di distingue i sessi: in i masci sò turchine mentre sò rossu aranciatu in e femine; in tramindui i sessi a pinza hà lati di culore turchinu, da induve vene u so nome cumunu.

A taglia massima mintuvata in a litteratura per u ganciu turchinu hè una larghezza di 22,7 cm in u masciu è di 20,4 in a femina.

Biulugia

Mediamente a longevità di u ganciu reale turchinu hè di 3 o 4 anni ma pò à spessu ghjunghje à cinque ed eccezziunalmente sin’à ottu anni.

Alimentazione

U ganciu turchinu hè un animale onnivoru cù una dieta pocu specializata. L’alimentazione hè basata nant’à pesci, altri crustacei, molluschi è materiale vegetale. I studii cundutti in l’areale naturale americanu mostranu chì a dieta di u ganciu turchinu cumporta sopratuttu pesci è i so resti, molluschi bivalvi, molluschi gasteropodi, crustacei anfipodi, decapodi è misidacei, alghe verde di u generu Ulva, fanerogame marine di u generu Zostera è ancu larve d’insetti ditteri Chironomidae. L’individui di piccula dimensione cunsumeghjanu relativamente più crustacei, molluschi è vegetali ch’è l’adulti chì à u so tornu caccighjeghjanu animali più maiò è cù cunchiglie più dure, cumpresi molluschi bivalvi cù cunchiglie massicce cum’è l’ostriche. I bivalvi custituiscenu una parte maiò di a dieta di u ganciu turchinu: a cunchiglia hè aperta da u latu di a mappetta tagliendu u ligamentu è i musculi adduttori chì tenenu chjuse e duie valve; sò scelti prima l’individui più chjuchi è più faciuli à apre. Studii cundutti in laboratoriu mostranu chì l'individui sottumessi à una dieta solu vegetale anu murtalità assai più alta, tassi di crescita più bassi è un putenziale riproduttivu minore ch’è quelli nutriti cù cibi animali. L’adulti mostranu una forte tendenza à u cannibalisimu nutrendu si spessu d’altri individui di ganciu turchinu, sopratuttu di e classe di taglia più chjuca.

Ripruduzzione

U ganciu turchinu ghjunghje à a maturità sessuale trà i 12 è i 18 mesi di vita sicondu a temperatura ambientale, dopu à circa 18 mute, dopu a fase larvale; u numeru di mute varieghja trà masciu è femina è s'avvera un pocu più altu per quest’ultima, in a quale pò ghjunghje à 20. À u raghjunghjimentu di a maturità sessuale u masciu misura in media 89 millimetri di larghezza.

U mumentu di l’accuppiamentu hè influinzatu da e cundizione di salinità è di temperatura di u mare, ma si face sempre in acque salmastre à bassa o media salinità, tipicamenti in l’estuarii o in l’acque salate appena fora d’elli. U masciu pò accuppià si parechje volte in a vita mentri a femina pò fà lu solu una volta; a finestra timpurale in a quale a femina pò esse fecondata hè assai corta: dopu à l’ultima muta (muta terminale o puberale) nanzu chì a carapazza si n'indurisca. L’accuppiamentu si face in generale di veranu o d'istate in l’areale nativu di a spezia: u masciu cunnosce a recettività di a femina grazia à i feromoni ch’ella libereghja è chjappa a femina immatura infilendu e so pinze trà quelle di a femina è u primu paghju di zampe; l’accompagna cusì sin’à a so ultima muta, quand'ella sarà pronta per l’accuppiamentu. U sperma, purtatu da i spermatofori, ghjunghje à e spermateche di a femina à traversu i dui pori genitali situati sottu à l’addome. E femine migranu dopu in mare apertu o in acque à alta salinità. Trà dui è nove mesi dopu à l’accuppiamentu a femina pò depone più di 2 millione d’ova. A femina ammagazzineghja u sperma ricivutu in l’unicu attu d’accuppiamentu chì basta per trè o più fecundazione, ma e depusizione successive à a prima portanu un numeru minore d’ovi. In climi timperati induve a prima depusizione si face di veranu, pò esse prudutta una siconda massa d’ovi in fine d’istate; pare chì in i mari trupicali l’ovi sianu deposti tuttu l’annu. Dopu à a depusizione, l’ovi sò trattenuti sottu à l’addome di a femina induv'elli sò mantenuti in locu da i pleopodi (appendici adduminali) furmendu una massa di culore aranciu d’aspettu spungosu. Tutti l’ovi in a massa ovigera si chjudenu à tempu in un unicu avvenimentu. Di e larve ne sopravvive circa 0,000001%. E cause di a murtalità larvale sò varie: ponu esse manghjate da vermi o tumbate da funghi, ma ponu ancu more per via di variazione di a temperatura di l’acqua o di una carenza d’ossigenazione.