Antartide

L'Antartide hè u cuntinente più meridionale di a Terra. Hè guasgi tutalmente dentru à u circulu polare è hè circondatu da l’oceanu. Hè u quintu cuntinente più grande, è 98% sò coperti da u ghjacciu.

Hè u cuntinente u più freddu, seccu è ventosu è tene l’altezza media a più alta di tutti i cuntinenti. L’Antartide hè cunsideratu cum’è un desertu incù 200mm di precipitazione à l’annu nantu à e coste (ancu menu in le terre).

Ùn ci hè un abitante umanu permanente ma ci stanu sempre da 1000 à 5000 parsone ind’e sfarente stazioni scientifiche spaperse nantu à u cuntinente. Solu organismi adattati à u freddu ci sopravivenu.

A prima osservazione certa di l’Antartide era in lu 1820 da a spedizione russia di Fabian Gottlieb von Bellingshausen è Mikhail Lazarev. In lu 19u seculu, u cuntinente ùn interessava à nimu, per via di e sò cundizioni estreme è di a mancanza di rissorse.

U nome Antartide vene da u Grecu antarktikos, « oppostu à u nord ».

U trattatu di l’Antartide fù firmatu in lu 1959 da 12 paesi. Oghje 46 paesi l’hannu firmatu. Stu trattatu pruibisce l’attività militare è u sfruttamentu minieru, aiuta a ricerca scientifica è pruteghje l’ecozona di u cuntinente.