Altocumulu lenticulare
Un altocumulu lenticulare (o Altocumulus lenticularis in latinu scentificu) hè una spezia d'altocumulu staziunariu à forma d'ossu di seppia chì si trova à livante di a cima di i monti sottu à u ventu. Indetta a prisenza d'un risaltu o d'un'onda orografica. 'Ssu tipu di nivulu hè chjamatu "a seppia" in lingua corsa, o ancu "nivulu sippiosu", per via di a so sumiglianza impurtante incù un ossu di seppia.
In realità, 'ssu tipu di nivulu si riforma di cuntinuu da u latu di u ventu è si scioglie da l'altru latu, furmendu un nivulu staziunariu chì cuntrasta incù u ventu orizuntale forte à 'ss'altitudine, chì duverebbe spustà lu prestu. A spezia lenticularis pò dinù esse truvata in altre famiglie di nivuli, frà i quali u cirrocumulu lenticulare à alta altitudine è u stratocumulu lenticulare à bassa altitudine, sicondu u livellu induve l'onda surghjente si produce. Sicondu e cundizione, ci hè à spessu un accatastamentu di parechji esemplari.
Furmazione
[mudificà | edità a fonte]L'altocumuli lenticulari sò u più suvente d'origine orografica, quandu l'aria chì scontra una catena di muntagne deve alzà si. S'è a massa d'aria hè stabile è chì e cundizione sò favurevule, l'aria calerà è cullerà in alternanza à u livante di l'ostaculu per dà una circulazione in onda staziunaria. L'aspettu in lentichja di u nivulu hè duvutu à u fattu ch'ellu si forma in cima o à livante di i picchi muntagnoli, mentre chì l'onda ùn permette micca à l'umidità di cundinsà si in bassura. A so pusizione stabile hè duvuta à a prisenza di l'onda staziunaria, chì dipende ella stessa di a stabilità di l'aria.
L'altocumulu lenticulare hè u più suvente situatu in cima di a muntagna, ma pò dinù truvà si à una certa altitudine sopra à quella, o annantu à e creste susseguente di l'onda à livante. Sò u più suvente assuciati à circulazione di direzzione particulare. Per indettu, in u mare Terraniu, a furmazione di un tale nivulu indicheghja à spessu l'arrivu di u Maestrale o di a Tramuntana. À u nordu o à u sudu di l'Alpe svizzere, signalizeghja l'attività di u Foehn.
In Corsica
[mudificà | edità a fonte]In Corsica, l'altocumulu lenticulare apparisce suvente sopra à i rilievi muntagnoli di u Capicorsu. Hè un segnu di l'arrivu imminente di u Libecciu, un ventu chì piglia una direzzione Punente, ancu Sudupunente ghjunghjendu à u capu di a Revellata è in Balagna, sottu à l'influenza di a dipressione secundaria di u golfu di Genuva. 'Ssu fenomenu hè bellu cunnisciutu da i meteorologhi è da i corsi.
Benchì 'ssi nivuli sianu spettaculari è qualchì volta cunfusi incù oghjetti vulanti micca identificati, sò dinù un indicatore preziosu per l'avviò cummerciale è privatu, postu ch'elli signalizeghjanu zone di turbulenza in aria chjara chì ponu esse periculose per a navigazione aerea.