A scusa à Prete Paulu
A scusa à Prete Paulu hè una puesia di Lisandru Ambrosi (1798-1842), racolta da a tradizione orale.
A scusa à Prete Paulu
[mudificà | edità a fonte]- Vi dumandu, o Prete Pà,
- Scusa, s’aghju mai mancatu
- À le volti à lu cantà.;
- Mi dispiace ch’un curatu
- Cum'è voi sia lu ciarlottu
- Da l’Espacu à Vicinatu.
- Passighjate incricchillitu,
- Vi piace acquavita è vinu,
- Site un pretucciu cumpitu
- Ind’a pieve du Rustinu.
- Ùn ci n’hè di a vostra fatta;
- Dite in crusca, à belbellinu.
- Po’ ùn site pe i talenti
- Micca scherzu. Avete un stile
- Per riguerdu à i cumplimenti
- Cù lu sessu feminile,
- Chì faria torce le labre
- À chiunque muccichile.
- Quand’ete da fà qualcosa
- Pricurate di piattà vi,
- Nè la rima nè la prosa
- Sò capaci à stumacà vi
- Chì mi faria truncà,
- Si l’avessi, un par di capi.
- Vi piace la carne cotta
- È lu pane studiatu,
- A salticcia è la casgiotta
- È lu frittu di castratu,
- Eppò dopu qualchì fruttu
- Si qualchissia l’hà datu.
- Perchè voi site un bon prete
- Dite a messa di bon’ora,
- Fate corte le sicrete
- È chjucchettu à tutte l’ore
- Poi s’avete un pò di tempu
- Fate u frescu à la signora,
- Una donna chì à mumenti
- Si pò di ch’ell’hè cummuna;
- Li manca ùn sò quantu denti,
- Gialla, corta, murcia è bruna
- Ch’hà un par' d’ochji sburlati
- Quasi tamant'è la luna.
- Avete discernimentu
- Per dirige i vostri affari,
- Lestu lestu cum'è u ventu
- Vi zirbate ind’i lignari
- Chì per scrinicà centu anni
- Ùn v’infattanu i mio pari.
- L’altr’eri aghju liticata
- Ancu in veru la mio musa;
- Guasi ch’ùn l’aghju chjirchjata,
- Dissi : « Vai è cheri scusa
- À prete Paulu, u corciu,
- Perch’ùn face cio ch’ùn usa. »
Referenze
[mudificà | edità a fonte]- Ceccaldi, Matteiu (1976) Antulugia di a litteratura corsa - Anthologie de la littérature corse, Klincksieck: Paris