A Pian' d'Avretu

À prupositu di Wikipedia

A Pian' d'Avretu hè una rivista criata in 1991 in Portivechju. U prima dirittori di publicazioni fù Marcu Biancarelli. À l'origini a publicazioni era solu in lingua corsa, è si ghjiraia prima di tuttu versu a criazioni. Certi scrivani cunnisciuti in u duminiu di a litteratura corsa ci participoni : Marcu Ceccarelli, Ghjacumu Biancarelli, Ghjacumu Fusina, Alanu Di Meglio è altri. In 1995 Petru Ciabrini presi a dirizzioni pà dui numari chì duviani chjuda a prima epica di u ghjurnali (1991-1995, cù 19 numari publicati).

Ci volsi à aspittà à 2004 par veda rinascia A Pian' d'Avretu, sempri cù Marcu Biancarelli à a dirizzioni, ma cù un' andatura à pena diffarenti chè prima. Oramai i testi erani scritti in corsu o in francesu è a criazioni lacaia piuttostu a piazza à i testi di libara opinioni o à l'infurmazioni culturali. Parichji parsunalità impurtanti funi tandu invitati da a rivista, com'è i scrittori Marcello Fois è Raphaël Confiant, o l'universitarii Bruno Etienne è Nicolas Bancel.

In 2007 Paulu Desanti duvintò u terzu dirittori di A Pian' d'Avretu è cuntinivò un travaddu à longu andà ridendu à a publicazioni un carattaru più vultatu versu a criazioni, è sviluppendu in primu locu i critichi litterarii.

Al dilà di quissi mintuvati, i parsunalità chì ani marcatu u più a rivista par via di a so prisenza in u cumitatu di ridazzioni è di u so travaddu funi - frà altri - Didier Rey, Stefanu Cesari, Arnestu Papi, Vincenti Tramoni, Maria Petra Valli, Bernardu Biancarelli, Filippu Antonetti, ecc.


Rivista litteraria in lingua corsa

A Cispra - A Muvra - A Nazione - A Pian' d'Avretu - A Piazzetta - A Spannata - A Tramuntana - L'Annu Corsu - Avali - Bonanova - Rigiru - Tarrori è Fantasia - U Muntese - U Lariciu - U Scoddu -